Was war denn des für a Joahr? Do hot mr doch tatsächlich mol was erlebt, was es so no net gäbbe hot. Ofang des Jahres hend mir älle no mit em Fenger zu de Chinese zeigt „Gucked, des isch Soddom ond Gomorra bei Denne“ hend mir gläschderd.
Ha, kaum hemmer ausgläschderd, hemmer bleed aus dr Wäsch guckt. Net bloos die Chinese, noi, älle, die ganze Weld hot blötzlich bloos no von Corona gschwätzt. Oh je, wie furchtbar, im italienischen Bergamo sterbed Leid wied Fliege, s Militär kommt nemmer henderher ond transpordierd d Laiche mit Laschtwäge.
Onser ganze Welt hot ofang, verrückt zom spiele. Durchdräht send se. Net bloos onsere Politiker, älle, uff derer ganze Weltkugel – koiner wusst, was zu tun isch, koiner wusst, wie mr damit omgehe sodd. Aber älle hend oi Ziel ausgäbbe – s Läbe isch me wert als älles auf der Welt! Krieg gegen den Virus, der griegt ons net, den bekämpfe mir.
Oi Angsttyrrade nach dr Nächste wurde uffbloose. So lang, bis die Politiker sich einig waret – Onser Kampf gegen des Virus isch bloos erfolgreich, wenn mir älle dohoim eisperret, älles schliesset, älles dicht mache. Wenn des Virus merkt, dass koiner me do isch, gohts hoffentlich von alloi wieder fort…